阿姐生日

阿姐生日，全部同事一齊食飯，一行成十人去咗食宜和Grappas食飯，每人叫set食自己，我叫咗三文魚，普普通通啦!

美都餐室

去美都，為咗想影相，好懷舊，好有feel，叫埋茶餐廳經典食物，西多士加紅豆冰，正!

Smurfs

同朋友去青衣城影藍精靈，有個90後問我啲個藍色公仔係咩先驚覺，係喎，藍精靈冇重做過，班後生真係冇睇過唔知係咩喎。

阿龍咖哩

去開油麻地，去食阿龍咖哩，係巴基斯坦咖哩，特色係落好多番茄，我都係鐘意印度咖哩多啲，今晚叫咗咖哩雞，牛腩絲甜簿餅同普通烤餅，個牛腩絲甜簿餅味道怪怪，如果唔係甜應該好味好多!

油麻地、廟街、上海街

一直都好想去油麻地影吓啲黃色招牌，因為真係香港獨有，今日就同朋友去咗影，一路影一路驚比人打，所以都唔係影好多。上海街有好多整蛋糕工具買，廟街啲歌舞廳又好懷舊，直頭係娘，唔知會有咩人入去聽?

四川私房菜

同朋友去咗嘉咸街大平伙食四川私房菜。菜色有涼拌三絲、糖醋香瓜、酸辣粉皮、口水雞、水煮牛肉、豆花雞湯、紅燒牛肉、粉蒸排骨、麻婆豆腐、豌豆湯、水餃、雪梨雪耳豆腐花。當中有辣有唔辣，豆花雞湯，豌豆湯用來解辣。口水雞正!水餃同甜品唔得。整體唔係真係超好味，3佰幾蚊又好似唔係好值。不過老板娘煮得又唱得，老板就畫得又serve得，每次當客人食完甜品，老板娘都會高歌一曲多謝食客，佢既女高音真係堅，直頭可以震爆玻璃，今晚啲餐都可心既。

南記

收工同同事去食飯，同事帶咗我去南記。南記開到周圍都有，我都係第一次食，叫咗個豬腩肉窩米，都算幾好味，又夠飽。

鮑參趐燕窩+紅酒

今日老豆突然話請食翅，同埋阿媽三個去咗太古鐘菜食紅燒火紅血燕同豆乳雞湯燴翅套餐，三人食兩個餐，每樣試啲，剛剛好，又好味!正!

豆乳雞湯燴翅有:

豆乳雞湯燴翅
南非鮮鮑遼參
厚切叉燒拼雲耳
香草汁脆魚柳
白汁元貝焗飯
鮮奶燉血燕
紅酒 / 橙汁

紅燒火紅血燕有:

紅燒火紅血燕
鮑汁雲海四頭鮑
宮保汁生煎美蠔
榴汁妙齡鴿
雞湯白玉燴珍菌
崧仁紅米炒飯
鐘家甜品
紅酒 / 橙汁

日式甜品 - 瀰月屋

去灣仔食完飯，去天后食甜品，一間好有日本昭和年代既日色甜品屋。叫咗琉璃櫻桃(車厘子蒟蒻)同櫻花花蜜特飲,兩樣都好好味。坐住塔塔米，聽住近滕真彥既歌食日式甜品，正，有機會會再食過。

船街晚飯 - Lime House

朋友約食晚飯，我提議去Lime House。一直都想去啲度試吓，因為環境好正，小屋小店，有外國feel。未去之前都抱住英國菜味道應該普通，冇特別。但係，今晚試過，有驚喜，出奇好味!我哋叫咗必食鴨蛋煎鴨肝(duck liver with egg)，鴨肝入口即溶，肥美。鴨蛋蛋黃流出加埋鴨肝一齊食，超好味!我哋仲叫咗bangers and mash同Shepherd’s Pie，都係好好味!

港土茶記

約咗舊同事食飯，去徐蒝開既港土茶記試吓。講到又用音樂蛋，餐肉又自制，就去試一試。自己叫咗餐蛋通，朋友叫牛肉炒通粉，味道特別，同出面茶餐廳唔同，唔可以話唔好食，但又未至於好好食，可以一試既。

滿江紅

睇完生明樹，真係想叫回水，以為自己去咗太空館睇星星月亮太陽，悶到不得了。套戲垃圾，唯有食餐好。今餐食四川菜，好好味!水煮魚，口水雞，yummy，愛上麻辣!

生命樹前

 

去The One睇生命樹，開場前去金寶食tea，雞翼餐普通，朋友叫個湯河，等成粒鐘，唔會再有下次!

老香港

太古又有新展覽，迷你場景玩具，好cute呀。

David之夜 - 北角鳳城

舊同事gathering，去鳳城食懷舊菜。打去訂位，順便訂埋幾款必食懷舊菜，有金錢雞、鍋貼明蝦、金錢蟹盒同西米布丁，去到再叫咗燒味拼盆、西生菜鵪鶉崧、炒鮮奶、煎年耦餅同鳳城炒飯。金錢雞，鍋貼明蝦好好味，金錢蟹盒油咗少少，不過都好味。西米布丁甜咗少少，六個人十個菜，食到好飽好滿足。

仲有要多謝前J同事既生曰禮物，同埋前K同事既聖城手信，中東芝麻餅、埃及版無印香水同埋好苦既死海海水，同你地食飯真係好開心呀！

Rex Cafe

同事71生日，早一日提早同佢食個午飯慶祝。今次揀咗Rex Cafe，又係一直都想試吓，上次行過想食，見到個餐牌，都幾貴，百幾蚊一個午餐，環境又嘈，好似唔多值所以冇試，今次係生日，所以食豪啲啦。叫咗個羊架，又幾好味喎，試埋佢既主打咖啡，perfect!