東寶小館

約極都約唔到E先生，心情低落，比屋企人拉去北角東寶食晚飯。6:00，都要等位，超多人，點了風沙雞、例湯、蝦醬通菜煲、炸筍殼魚。個湯好飲，但其他真係麻麻。老豆話筍殼魚唔係度度都有，係炸得香口，但價錢貴，細細條，伯幾蚊，例湯都成伯蚊，真係唔會再來。

民聲肉餅

一直都好想入大坑試民聲肉餅，最近大坑總店裝修，睇雜誌，原來筲箕灣東大街開咗分店，咁近我屋企，當然要去試吓，叫咗肉餅、泰式骨、豉油雞。肉餅真係多汁鬆化，其它都好味，唔錯!

小甜谷

大坑店一早去過，甜品真係做得唔錯，今次行海運分店，因為影多啦A夢影到攰又口乾，試飲蘋果爽，真材實料，下次行得攰抖一抖係不錯選擇!

多啦A夢

海港城過佰個多啦A夢，好壯觀，好多人，但又忍唔住人迫迫都要影相。除門口佰隻叮噹，仲有長大後既大雄，仲同靜香結婚呀。

試玩ukulele

朋友想學ukulele喺草地自彈自唱，叫我去咗尖沙咀試玩30分鐘免費ukulele，都幾得意，學咗2個chord，C chord & G7 chord，仲學埋Mary had a little lamb!轉chord真係要多練，因為真係有難度，轉得好鬼慢呀!

韓燒 BBQ Brother

玩完ukulele，朋友話想試嘉蘭圍新開韓燒，佢話裡面裝修到同韓國既一樣，好有待式喎，就即管去試吓。walk-in去到好早，五點半左右，都話要六點半要交枱，唯有極速怒食。點咗豬皮、雞皮、豬腸、牛胃，咁有韓國米酒，好好味╴但超肥，仲好貴，埋單2人要成500幾蚊，食一次夠啦!

大坑Piccolo

收工約朋友入大坑食Pizza，Piccolo好多人話好得，又係最多人食既一間，就試吓睇吓係咪咁得先，叫咗個辣肉腸pizza同carbonara spaghetti，pizza普通，意粉麻麻。不過其實好唔好味都唔重要，我選大坑晚飯都係想睇吓撞唔撞到E先生，真係好掛住佢，好可惜今晚撞唔到!

囍館

去東大街試新嘢，見雜誌講過囍館好味，就去試吓，又真係幾多人，2個人，點了兩個菜，雖然唔係推介，但又真係幾好味。可以再來。

去了法國 - LA Creperie

今日見唔到佢，唯有出走法國，走食crepie飲cidre。LA Creperie喺上環蘇杭街開分店，白色小屋，外面已經好有法國feel，店內人客同waiters全部都係外國人，感覺relax。叫咗一杯cidre，dry，5%酒精，易入口。食物方面，點咗La Bigoudene，係鹹既crepie，有洋蔥、火腿、太陽蛋、French Emmental Cheese同菇，第一口，好味!太大份，食到一半已好飽，其實可能甜既會仲好味，我叫啲個太多菇，我麻麻地菇呀!

Heirloom Eatery & More

同朋友去LOMO　shop，去完就行去附近食個晚餐，上環一間西式餐廳，裝修都將特別，所有嘢都九唔搭八，又雞公碗，又西式傢具，mix & match，特別。
食物方面，唔好祈望咁大，飲嘢好過食嘢。兩個人，只點了taco，同炸雞晚餐，加支beer，食唔飽，再去下一場食過。

皇后街市熟食市場 - 陳財記

食完晚飯，朋友未夠，轉地方再食過。佢話食螄蛤，不過去到又冇得食，今晚已經係第三餐，一晚食3次晚飯，肥死。

FIAT

約咗朋友仔晚飯，去咗銅鑼灣FIAT，係汽車show room，又係餐廳，一邊食，一邊試坐，一邊影相。Set dinner佰幾蚊一個，有湯，意粉，雪糕同茶，最好味就係雪糕，真係好好味。開心的一晚。