行年宵食拉麵飲啤酒

今晚約好同事去行年宵，好快行完一個圈就入去大坑達磨食拉麵，一直都話達磨拉麵好味，今之朋友食過，佢哋都話好味!

食完，就行去街口間bar啤一啤，賀我有學校收，有書讀啦!又叫了雞翼，薯條同燒雞泡魚干，3樣都好好味，個feel又好，不過今晚佢哋講錯嘢激嬲我，可惡!

年花

新年快到，收工同阿媽去花墟買花，買花都買咗600幾蚊，行咗她2個幾鐘，都唔知買咩花好，樣樣都想買，返到屋企，插吓插吓，好幾靚喎，真係有插花天份。

好好味日式料理- 稚內

收工同媽媽去花墟買花，買完見到有間餐廳冇咩人，就走入去食，一間好精緻餐廳，細細間，一坐低就送了一小杯酒，暖暖的，好甜，好好飲。

媽媽不食生嘢，所以點了三文魚炒飯，燒雞翼同燒BB番薯。炒飯炒得很香，一粒粒很乾身，味道剛剛好。燒雞翼夠晒味，雞皮燒得脆脆，很香口。BB番薯好甜。可以再來的一間餐廳，下次要試一試魚生，飲一飲清酒。

平價北海道牛油拉麵

屋企冇飯開，自己去咗太古城中心大食代Domon食咗個平價$48北海道牛油拉麵。話明平價，一定唔會好好味，但又唔會難食，算係咁啦。

潻馬公園

Happy Friday，行咗去潻馬公園lunch，食完飯，行出海邊，望返轉頭，原來個公園好靚架。So relax!

旺角放題

再次團購食放題，今次係旺角火鳥，$122任飲任食，連清酒都任飲，好多好多嘢食選擇，雞翼炸得脹卜卜，好脆。燒物好夠味，燒得香香的，燒粟米一叫再叫。魚生都叫ok，未算好生鮮，但都叫好味。每枱有一鍋辣雞煲，雞煲都好冶味，但太大煲，食完真係唔洗食其它嘢啦，甜品有雪糕，話係Dryers，但唔似，Dryers有紅豆雪糕?不過都好好味，唯一搞笑係個雪糕柜太凍，雪糕太硬，超難刮啲雪糕出嚟。仲有一樣唔好係嚴重漏單，要order好多次先來一碟，今餐抵食又開心。

中環放題

近期鐘意日式放題，買了團購去中環松家食放題，$169一位，但peak hour要加$30，啲樣加啲，嗰樣加啲，都要二佰幾蚊一位，都幾貴。

食物方面，其實我覺得幾好味，但同事覺得麻麻，有沖澠來的啤酒，特飲任飲，特飲有啲好有啲麻麻太甜。魚生厚切生鮮。熟食好味，豬頸肉入味，青口、粟米、雞腎、羊架、牛柳粒全都好夠味，但比較油。泰式雞腳好好味，可以再要多一轉。入坐每位送一客鵝肝多士，juicy爆油超好味，唔夠喉，叫多個鵝肝手卷，滿足。甜品有雪糕，不是牛奶公司，好好味!另一樣要讚是沒有漏單，每份好足料，好夠份量，可惜沒有清酒任飲，愛酒的同事要比錢飲啦!

桃園牛筋麵

大掃除完，去樓下桃園食過牛筋麵，桃園在筲箕灣好多年，又細食到大，牛筋好腍，湯都好味，雖然麵就差少少，但廿蚊碗，比起中環區的好多鋪頭平同好味，舊區有舊區的好，就是平靚正。

越南滴漏咖啡

屋企有煉奶，又有咖啡，就用之前越南買回來既滴漏壺來個越南滴漏咖啡，沖法很簡單，先在杯內放上煉奶，咖啡由滴漏壺滴下就成。味道很濃，很甜帶少少苦，就是越南咖啡特式。

一月份的聖誕聚餐

與舊同事聚餐，買了團購$225Stanford Hillview自助餐，好平，最重要有生蠔，但每次出好少，要爭食先食到6隻，食物唔太差，串燒好好味，甜品就差啲，好開心6月份重有聖誕禮物。

燉奶佬

影紅葉前，同事帶走燉奶佬食下午茶，太耐冇食燉奶佬啦，細細個在筲箕灣成日食。依家金裝燉奶佬，食物都好唔同。

叫了個紅豆西多士，佢個麵包皮沾上不知是什麼，炸了後很硬，令西多士不夠脆，紅豆作餡，都好味，可是比較濕，都是舊式西多用花生醬做餡好好多。

紅葉

啲期最紅，影紅葉，個個去大棠影，我就去了青衣，同事話佢屋企樓下有紅葉但冇人影，結果我就一人獨佔三棵樹慢慢影紅葉。走時，行入青衣公園，多人，但都好靚，金黃的一大遍，好秋色。