又放題

舊同事要去澳門工作幾年，出發前，同佢去食個放題，原本訂了松出，但因為遲到，冇了一半時間，所以去咗第二間，千江雪，魚生厚切，螺鮮甜，三文魚吞拿魚都OK，至於熟食，雞翼燒得幾香口，炸物脆口，但不夠乾身，最特別係有兩種自創料理，荊柯刺秦皇同火燒苛房宮。荊柯刺秦皇係火炙劍魚腩刺身，麻麻地。火燒苛房宮就係火焰牛油配三文魚蓉腐皮壽司，上枱時會點火，好搞笑。甜品有雀巢雪糕。汽水每人只可叫一罐，清酒冇得任飲，$45一小壺。今晚個放題都幾好。希望前K同事過到澳門順順利利啦。

九州拉麵金田家

星期六長週，舊同事約食午飯，記得雜誌剛介紹又有一間拉麵店金田家開業，在九州攞咗好多獎，所以就去試一試。雜誌介紹金田家有一部自動販賣機，點知去到先知冇得玩，部機只係用來食完拉麵抽獎，有啲失望，再見到門口影食物張相，第一感覺係唔方好食，入到去，是旦叫了碗經典拉麵，有一塊紫菜，三塊超薄叉燒。先喝一口湯，感覺有驚喜，湯底濃郁不膩，有豬骨味又不過鹹，得!叉燒是我最愛的肥叉腩肉，甘香油潤，正，可惜太薄。至於麵就選了軟硬適中，食到最後一啖都不會過腍。整體來說不是最好的拉麵，但算得上好味有驚喜!

小甜和果子 - 宗家源吉兆庵

行過sogo地庫，見到好靚既和果子，見好耐都冇食過，就買了兩個和果子。一個係紅豆草餅，另一個是櫻花和果子。

紅豆草餅好傳統，比較甜，紅豆好香，草餅好軟身，好好味!

至於櫻花和果子，愛死了，粉紅色已經另賣相給引，仲要沒有一般和果子的死甜，軟綿綿，內裡黃色餡料不知是什麼，但好好味，櫻花、粉紅、甜品，好浪漫呀!

新娘潭

Easter Holiday，同同事去利山，今之選了行新娘潭。在大埔坐20C綠van，到總站，由八仙嶺自然教育徑開始，行個半鐘，行過橫山腳下村，就會走完頭一段路，過對面馬路，就是新娘潭自然教育徑入口，整段路大約行個半鐘，沿路會見到照鏡潭，但有好多賓賓，好大剎風景，太多人在那裡野餐，都冇與趣多留及影相，再行到去浦尾，整段路行完。

好肚餓，去了鹿頸BB開心士多食了出名的鹽焗雞牛筋腩麵，真係好味喎!

放題farewell Dinner

同事farewell，一大班人去了尖沙咀漁屋食晚飯，6位送1位，$240位，汽水啤酒清酒任飲，荃灣分店一早試過，尖沙咀啲間特別之處在於無啦啦全場有抽獎，抽到就有蟹食。好搞笑!

食物選擇好多，有好多放題都沒有的雞泡魚干，我最愛。

炸物乾物脆口，燒物亦出色，燒牛舌腍身有牛味，鹽燒串燒雞軟骨超好味，又脆又香口，食完一串又一串。魚生厚切生鮮，很不錯的放題。

美荷樓YMCA

Conservation Study最後一堂，阿sir帶去美荷樓YMCA，有得上房睇，有單、雙人房，仲有多人房有碌架床，啲房都幾好呀。

勝利牛丸

學完車，去了勝利牛丸食個牛丸牛筋麵，勝利牛丸好似在元朗好出名，一直都想試佢啲牛丸有幾正，可惜今次失望，平平無其，同街市買沒分別，街市有啲都好食過佢，沒有牛味，又不是特別彈牙，牛筋好啲，夠腍入味，麵就唔得啦，失望，食一次就夠。

早茶

星期六，9:30學車。7:30去到錦上路，與前T同事&K同事揸車去大帽山端記飲早茶。全自助形式，no service，真係好有趣，雖然早，但都好多人，自己鐘意食咩自己攞。叫咗好多，糯米雞、蝦餃、鳳爪、炸蝦角、牛肚、排骨、奄春蛋燒賣，食物味道好地道，舊式茶樓風味，賣的是特式，埋單好平，只係伯幾蚊。真開心。

唔知係咪太早起身，冇精神，揸車錯晒，比阿sir話到落尾，下堂我會揸好啲啦!

綠茶滑滑雪糕

食完拉麵，帶同事去食雪糕，Via Tokyo近期出晒名，本身不好綠茶雪糕，但都要試一試睇吓係咪真係咁好味!

我點了白玉紅豆抺茶雪糕$45，同事點了白玉抺茶雪糕餡蜜。

大大大大杯雪糕，雪糕好滑，好有綠茶味，仲要到食完都唔多溶，一直可以keep住雪糕狀態，讚!紅豆甜，加上白玉冇咩味，不至整杯雪糕過甜，真係好有水準的雪糕!

博多拉麵

收工好想食好嘢，同同事去銅鑼灣試新拉麵，今次去登龍街食博多一幸舍食個博多拉麵。博多一幸舍在福岡有多間分店，湯底時豚骨湯底，我點了黑拉麵(黑芝麻炸蒜油味)$78，朋友點了紅拉麵(明太子海鮮味)$78，再點了炸雞$30及餃子$30作小食。

黑拉麵，油底好油，食不出蒜油味又食不出豚骨味，不是我杯茶，叉燒瘦，又不是我口味。

偷飲了同事紅拉麵的湯底，好味些，但都是偏油及沒有明太子的鮮味味道，同事說麻麻。

反而炸雞比較好，炸得夠脆香口，至於餃子，屬普通之作，size細，與超市買的無異。

如要比較，對面的豚王好好多!