第五天持續落雨，食完早餐，就去圓山站既花卉博覽會。入場費300蚊台幣。好多人排隊，有啲場館已經額滿，我同朋友只係求其行個圈，睇吓紀念品就走。
本來想去忠孝復興站既Hello Kitty Sweets餐廳食lunch，點知fully booked。
最後，唯有去咗周杰倫開既豚屋食炸豬扒，門口真係有一隻真既小豬喺度架。見唔到周杰倫，不過食物又幾好味。
午飯後，仲有時間行埋Sogo同三越。
四點，坐飛狗巴士出機場，晚上七時二十分，飛機起飛，五天行程結束。
總括來說，好玩，完全推翻咗我一向對台灣既印象。依家既台北，簡直係A貨日本。
第四天早上六時，起身見到外面落雨，決定取消去野柳同基隆，再訓到九點幾先起身。今日第一站，行去恆志買假眼睫毛，買咗熱賣既公主李交叉七(黑)同AK，番去有排玩。
之後，行咗去台北站，然後再去忠孝敦化站食度小月擔仔麫，細細碗，好味。仲叫咗蝦仁肉圓。全餐食咗190蚊台幣。
跟住，又去咗隔離街食粉圓，普通糖水咁啦。
食飽，行街街，比我哋發現咗敦化南路一段，近忠孝敦化站7號出口附近嗰幾條後街，成個日本原宿咁，好鬼正，間間銷啲衫都好似好得，所有嘢都好日本，型人型鋪型衫，又唔係太多人，如果唔係落雨，我一定間間都走入去望吓。
喺嗰區，有一間好kawaii，好colourful既法式糖果店 - 好樣棒棒(VVG Bon Bon)。
一推門，嘩，好可愛唷!第一件事，攞起相機，拍拍拍，間鋪每一個角落都係一個拍攝點。
店鋪有花茶，有cup cake，有套餐，我同朋友只叫咗兩壺花茶，連茶具都好靚!
坐到天黑，行番出去，亂行，又比我哋行咗去微風廣場，然後喺忠孝復興站搭去西門丁，食咗個鴨肉扁，總算食過，普通。
之後，再食埋阿宗麫線，麻麻地，唔推介。不過話晒都係西門丁出名小食，點都要試吓囉。
又去果風小鋪咗買有趣朱古力。
最後，買埋老天祿鴨舌、豬腳筋、鴨腎返酒店食。
