朋友多次問過我去唔去台灣睇放天燈，其實12年前去過台北之後，一直覺得台灣好悶，地方似大陸，冇咩好玩，所以從此之後，都冇再想去台灣玩。但朋友問得多，見個package唔係貴，5日都係3千蚊，又口快快應承咗，所以就唯有再去一次。今次，目的地都係台北，再去埋平溪、十分、菁桐睇放天燈，台北祈福5天遊正式出發!
早上9時20分，國泰530班機起飛，食過一隻火腿蛋包之後，話咁快就到咗桃園機場。
用90大元坐大有巴士出市區，行咗幾條街，終於搵到我哋book咗既酒店 - 舞衣新宿。
未夠chick-in時間，去咗隔離街既人氣食店，前肥屋，叫了必食鰻魚定食同蛋卷，仲點咗牛肉飯，鰻魚肥美，價錢ok平，埋單都係360蚊台幣。但未至於好好味，蛋卷味道比較淡，冇咩味，其實成餐麻麻地，又比雜誌啲介紹呃咗!
chick-in上房，房間細細，廁所冇鎖，因為成個廁所都係玻璃造間隔，好在係有磨沙，最鐘意係佢個衣櫃，透明，著咗燈成個玻璃發光盒咁。
抖咗一陣，就去咗第一個景點，龍山寺站既艋舺剝皮寮。剝皮寮係艋舺既拍攝主要場地，感覺好懷舊，都幾得意既。
剝皮寮附近有龍山寺，聽聞好靈，不過因為時間關係，都冇入去拜神。
再行遠少少，有華西街夜市同廣州街夜市，有好多嘢都好似好好味，不過因為要留肚食麻辣火鍋，所以冇試到。
是日晚餐去咗太和殿，叫咗金菇，肥牛，腐皮，油炸鬼同肉丸，今餐好好味，油炸鬼同麻辣湯底簡直係perfect match，烏梅汁又好飲，正!但價錢唔係平，今餐要台幣1450蚊，即港紙4佰幾。
食完飯，慢慢行去國父紀念館睇吓花燈同激光show。好似去咗維園咁，不過個激光show都幾好睇。
沒有留言:
發佈留言