呼吸2013最後一口空氣

2013年最後一日，避開人群熱鬧，去了深水埗美荷樓內的呼吸餐廳食嘢，飲嘢，坐吓影吓相。

人好少，靜，背景有輕音樂，好relax，一個好hea既地方，喜歡它的自助形式，自己出去看餐牌，喜歡什麼就自己去收銀處比錢，之後會有一個閃燈響鬧牌比你，當食物預備好，個牌會自動響鬧，你就可以自己去取食物。所有餐具、熱水、調味料都放在一架餐車上，全部都是自取，沒有人serve你，沒人打攪你，so free!

餐廳裝修亦有特式，舊物，vintage傢俬家品、畫等佈滿餐廳每一個角落，在這裡可見到茶餐廳間局，又有cafe寫意的一隅。

  

之前有上半場及中場，這個下半場，點了少少食物，炸春卷及凍咖啡。朋友點了一個呼吸全餐，食物味道比快餐廳好味，春卷脆但不油，咖啡是cafe質素，不錯不錯。

呼吸全餐即是all day breakfast，很大份足料，多士、薯餅、腸仔、焗豆、沙律、炒蛋、炸魚，橙汁，朋友說味道不錯。我試了一片多士，配上自家制的蒜蓉牛油，很香，很特別。

呼吸餐廳對面有一間呼吸士多，賣一些懷舊玩具，懷舊糖果，還可以記一張postcard給自己。這裡太舒服了，沒有萬人倒數，靜靜的過渡2013最後一日，2014新年快樂!

百蘭地栗子卷

之前試整apple pie買錯酥皮，趁聖誕，用佢做其它租品，栗子卷，好香酒味，但太甜了，下次份量可以落少些糖。

材料:
栗子蓉一罐
朱古力粒20克
提子乾20克
呍呢嗱味精半茶匙
百蘭地20ml
酥皮三塊
牛油20克
水適量
海綿蛋糕(刨碎)適量

做法:
(1)焗爐調校至180度，預熱15分鐘
(2)朱古力加入栗子蓉內，並加入牛油、水、提子乾及、海綿蛋糕碎拌勻。
(3)加入呍呢嗱、百蘭地
(4)酥皮塗上蛋漿，放上另一塊酥皮，擠出中間的空氣，包成春卷狀，在面塗上蛋漿
(5)放入爐焗8至9分鐘，出爐後撤上糖霜。

黑松露汁鮮菇燴長通粉

聖誕餐飽肚之作，又點少得意粉之類，今次整年頭整過既黑松露通粉，非常好味，餐廳水準。

材料:
牛油 40克
洋怱(切絲) 100克
煙肉(切粒) 100克
本菇 200克
忌廉 200克
雞湯 100克
黑松露醬50克
鹽8克
長通粉 200克
Gruyere芝士碎 100克
小香蔥 (切段) 10克
車厘番茄(開邊) 10粒

做法:
(1) 平低鑊放入牛油，煮溶後加入洋蔥，煙肉及本菇，用中火炒3分鐘。
(2) 加入忌廉，雞湯，黑松露醬及鹽，煮滾後熄火備用。
(3) 長通粉放入大滾水內煮至8成熟撈起直接放入黑松露汁內，開大火煮2分鐘，最後加入Gruyere芝士碎，小香蔥 及厘番茄拌勻上碟。

海鮮酥盒

上之整蘋果批用剩一塊酥皮，今次party用來整酥皮盒。

材料:
蝦適量
蘑菇適量
蟹柳適量
水浸吞拿魚適量
粟米適量
蝦子、魚子適量
急凍酥皮一塊
雞蛋一個
麵粉少許
乾蔥
洋蔥
白酒50ml
忌廉150ml
蛋黃醬適量

做法:
(1)將急凍酥皮一塊
(2)將一半酥皮界成方形，再將另一半界成方框，在方形酥皮四邊塗上蛋漿，將四方框酥皮放上。
(3)放入預熱的焗爐內，用225度焗至酥皮脹起及呈金黃色
(4)鑊內放入橄欖油燒熱，加入乾蔥及洋蔥，少香蝦、蟹柳及蘑菇，加入白酒、忌廉、鹽、胡椒粉煮至濃稠，將海鮮忌廉汁倒入酥盒內
(5)將吞拿魚隔乾水，加入粟米，再加入蛋黃醬拌勻，放入酥盒內

忌廉汁瑞典肉丸配紅果醬

宜家經典菜式，正!

材料:
宜家肉丸一包
鮮忌廉70ml
水280ml
宜家肉丸忌廉汁一包
紅果醬適量

做法:
(1)把肉丸放入鑊內，蓋上鑊蓋並用中火煮10至15分鐘，期間不時攪拌。
(2)把肉丸忌廉汁加水用中火煮熱，並不斷攪拌至變稠，然後加入鮮忌廉，再以慢火煮5分鐘
(3)把肉丸上碟，淋上肉丸汁，旁邊配上紅果醬

燒排骨

另一聖誕主菜，ribs，味道同出面餐廳一樣，係焗唔到脆皮，下次可以用光波爐試。

材料:
豬肋骨 400克(大約10條)

醬汁:
茄汁400克
喼汁2湯匙
tabasco1/2湯匙
檸檬汁 半個分量
鹽 少量
胡椒 少量

做法:
(1) 將所有調味以慢火煮20分鐘，至糊狀成BBQ汁
(2)用油掃平均地將BBQ汁掃在豬肋骨的面層及底部
(3)豬肋骨醃2小時，待調味盡入骨，肉間
(4)預熱焗爐至200度，先焗25分鐘
(5)拿出蓋上鍚紙，再焗25分鐘
(6)拿出後多掃一層BBQ汁
(7)切件後，即可食用

燒雞伴金巴利汁

聖誕食燒雞是指定動作，今次不用焗爐，用光波爐，光波爐真係好用，爐出來效果好過焗爐。

材料:
雞 1隻
大蒜 80克
甘筍 80克
番薯 80克
洋蔥 1/2個
水 4公升
鹽 60克
牛油 40克
香辣粉(Cajun Spice) 10克
紅莓醬(Cranberry Sauce) 250克

做法:
(1)將4公升水連同大蒜、甘筍、番薯、洋蔥及鹽一起放入大鍋內。
(2)將水加熱至65度，放入雞，收慢火將雞浸煮40-45分鐘。
(3)將鍋內的雞及蔬菜撈起，轉放到烤盤上，用牛油掃勻雞身，下鹽調味後撤上香辣粉。
(4)放入光波爐以180度焗15分鐘，取出後以紅莓醬伴食。

焗香蕉卷

令一樣甜品，可以用埋剩返既香蕉，酥皮。

材料:
香蕉2隻
肉桂粉適量
砂糖適量
蛋黃1隻
酥皮4塊

做法:
(1)將肉桂粉和砂糖撈勻，兩者分量是3比1。
(2)把整條香蕉蘸上一層薄薄的肉桂粉和砂糖。
(3)兩塊酥皮重疊平放，放香蕉，左右兩邊掃上蛋漿，然後對摺，再在皮的上方掃蛋漿，由下捲上去成春卷狀。
(4)放入預熱焗爐內焗約10分鐘。

炸芝士雲吞

有炸物先似party，今年試試炸芝士雲吞，阿媽好鐘意食。

材料:
廣東雲吞(黃色) 20幾塊
Philadelphia cream cheese 1盒
菠菜 半斤

做法:
(1)菠菜拖水，揸乾，切碎。加入芝士，拌勻。
(2)放少許芝士菠菜在雲吞皮中央，在雲吞皮的兩邊蘸水，三角形的合上雲吞。
(3)慢火炸雲吞至金黃，用紙吸多餘的油。

聖誕粥底火煱

一個月前打去靚粥工房book位，最快聖誕節晚先有位，就跟同事來個聖誕粥底火煱。吃什麼冇得揀，老闆話事，大約$170一位，都有好多嘢食，鮑魚、蜆、蝦、蟹、蟶子、魚、
油炸鬼、響鈴、南瓜、蝦膠、牛展、魷魚、菇，雜誌話老闆係塔門人，全部都係塔門海鮮，唔知堅定流，但都叫新鮮，蝦膠脆，蜆多沙，蟹冇咩肉，但放晒落鍋到，煲粥好甜，最尾食了兩碗粥，鮮味到不得了。$170超飽聖誕餐，好開心的聖誕呀。

平安夜慶生日

楊經理生日，book了花串午飯，今次叫了北海道魚生飯，$220，有前菜沙律，湯，魚生飯有三文魚、牡丹蝦、帶子、海膽，全部超級新鮮，仲要大大大大件，三文魚切得超厚，食落口很肥美，好似食緊肥豬肉咁，海膽鮮甜，成碗飯係魚生多過飯，食完飯都未食晒啲魚生，飯亦都好味好綿。好飽好滿足。

生日，點可以冇生日蛋糕，的而且確係冇蛋糕，因為雪糕火鍋代替蛋糕，雪糕當然好味，個朱古力醬都好得，一個雪糕球放落朱古力醬，面頭既朱古力醬會結成脆皮朱古力，好有趣!楊經理happy birthday!

油麻地

放假，去佐敦交報名費，再行去上海街，睇吓啲杯杯碟碟，有一間直頭係賣酒店既餐具，真係好靚，行行吓，仲比我發現紅磚屋，有驚喜!

立體拉花

放假，一個人悶悶地出咗去尖沙咀，突然想起Allegretto，就去飲杯立體拉花咖啡先。雖然係平日，但都幾full，個個都係為了個立體拉花。點了杯玉桂味咖啡，等了一陣，有得攞啦，今次拉了一隻Bear Bear熊，真係好鬼得意，好可愛，同熊仔影完寫真，就要幹掉佢，真係有啲唔捨得，味道和其他連鎖coffee shop差不多，玉桂味道主要來自灑在咖啡上的玉桂粉，味道不太出，只有少少玉桂香味，三十多元一杯可愛咖啡，hea了一個鐘，超值了!

行吓行吓，去到海港城，仲比我見到好既既日落，突然想起Eason，夕陽無限好，天色已黃昏，本想去憑愛，去換最燦爛一生，想不到長吻，但來更永恆傷感!

超平超旺任食大排檔火鍋

天氣好凍好凍，打邊爐最好，收工同事話要帶我去沙田食超平火鍋，一行三人坐火車去到沙田圍，火車站對面就係新廣發，超旺超多人，好在剛剛有一枱人走。$68一位任食任飲，大排檔格局，全自助形式，自己去攞食物，自己去汽水櫃攞汽水，太有趣。雖然$68好平，但食物多多，肥牛、各種丸、蝦、麵、烏冬、菜，海鮮、連蠔都有，仲要是新鮮，真係超抵。味道方面，湯底不算濃，肥牛不會死肥，蜆有沙，炸魚皮夠脆，丸類彈牙，好多我都未見過食過，有個芋頭丸，甜甜地，幾好味，開心的一晚!

青葉放題

收工同同事去食飯，出到尖沙咀，都唔知去邊度食好，淨係話一係食放題，一係打邊爐。帶咗同事去厚福街，行到去青葉，佰幾蚊，又有清酒任飲，好似好抵，就入去試一試。

食物有好多選擇，但份量少，要不停密密寫點菜紙。刺身算不錯，都算新鮮，燒牛肉同串燒好味，味道不會太鹹，串燒又燒得很香口。炸物不油，整體來說熟食好過魚生。最失敗是甜品，沒有太多選擇，僅有的又難食，同事點了生果又變壞了的。但二佰元有找，好低。

抵食牛一放題

朋友突然約食飯，我提議去牛一，因同事食過話好抵，walk in去到，等咗成45分鐘先有位。點了壽喜鍋加極上美國牛，$168一個人，壽喜鍋重醬油味，有少少甜，味道濃郁。牛肉肥瘦適中，有肉味，好味。出面自助吧就攞咗好多丸，飽到連其它粉麵都食唔落，最欣賞佢有任飲同乳酪雪糕，酸酸甜甜好好味，不用二佰蚊，真係好抵食。

在公園午餐

公司在iBarkey訂了曲奇餅，lunch去攞餅順便食lunch，餐廳在添馬公園內，對住個大公園食飯，真係好舒服。午餐一用一佰元，有餐湯，餐包同主菜，飲品要另收費。餐湯時普通罐頭雜茶湯，味道普通，包不夠熱，主菜點了魚，好淡，汁又不夠味，不算得好味，但在金鐘地段，可以在開揚環境又不用一佰元就有午餐，算不差。

德國餐做宵夜

做完Event，跟朋友出尖沙咀King Ludwig Beerhall晚飯，出到去都成9點幾，晚飯變宵夜，估唔到德國餐廳都賣芝士火鍋，就來一個睇吓同瑞士芝士火鍋有什麼分別，火鍋底要求加了酒，但酒味不太出，芝士creamy，香濃，其實都幾濟，好在配料是生果同菜，不至太飽。除了芝士火鍋，還點了肉丸，好味，但又是一個好飽肚的菜式，再加上大大杯的德國beer，這個宵夜太heavy了。

池記

午飯時間同同事行去中環池記食Lunch，好快就有位，一坐抵見到個餐牌，都幾貴，平均要70幾蚊一個午餐，只得主菜加小食或甜品。直頭係高級版雲吞麵鋪，不過，身處中環，都明白中環就是這個價。

說回食物，套餐的主菜可選粥炒麵飯，小食有菜、雞翼等，甜品是糖水或豆腐花。我要了牛筋雲吞麵加豆腐花。麵沒有皂水味，麵質不會太腍，好!牛筋煲得好腍，又入味，好得。雲吞好味，沒有肥豬肉，雖然不是最好，但比起好多賣雲吞麵的鋪頭好。豆腐花滑，又出面有好多賣豆腐花的鋪頭比它更滑。坐得舒服又飽肚，但都係覺得貴了些少。

古堡午餐

朋友生日，去跑馬地Amigo來個生日午餐，一間有多年曆史的高級餐廳。大大個太陽掛在門口是它的標誌。入到室內，好靚，好似去到一個城堡，裝修雅緻，唯一不好的就是枱與枱之間太近，侍應又多，他們太勤力了，在餐廳走來走去，給人感覺有點迫。銀器餐具刻上餐廳名字，古典又高貴。

講回食物，叫了set lunch，包括有前菜/餐湯、主菜、甜品、一杯餐酒，紅酒/白酒，咖啡/茶。我要了周打湯、牛扒、紅酒及咖啡。湯連煲推出，在人客面前上碗，熱辣辣。餐包是侍應走來由你從他的麵包籃內選，很喜歡它的牛油，弄成玫瑰型狀，很別緻。牛扒亦是推到枱前，即場切件上碟，配菜另上在一隻碟上。喜歡牠的半生熟，但味道就普通，有點似自助餐的燒牛肉。餐酒選了紅酒，fruity，合我口味。甜品是炸的，內裡布丁軟綿綿，ok啦，雪糕就好好味!最後送上咖啡時，配有朱古力球，吃一個才知裡面是雪糕，成晚最好味就是這個隨餐飲免費送上的朱古力雪糕球，是成個午餐完美的終結。三百多元一個午飯，嘗環景，服務多於食物味道，但可在老牌高級餐廳內用餐，三百多元，是值的。