http://www.buffalotrails-cambodia.com/en/
早上9:00，導遊同tuktuk司機在酒店門口等，坐上車，先車我哋去一間cafe攞早餐，然後坐成個鐘去到一個小小市雜，睇一睇當地農民的街市係點，魚、菜、生果、熟食都有。
跟住，再坐一陣車就到村口，去到村口，就轉坐牛車入村，牛車是花招噱頭，對於成市人來說，真係好有趣!
沿路，見到好多小朋友，佢哋見到陌生人入村，跑過來追車，個個一面稚氣，單純只為跟我笑一笑，很純真，香港啲個物質城市，跟本不會見到這樣的天真笑容。貧窮但活得開心，城市越先進發達，快樂反而越走越遠，簡單就是快樂，何用活得那麼複雜。
經過學校，導遊叫我同朋友入去看看，入去課室，擾攘一輪，同班學生哥say個hi，就去村長屋企食早餐。
村長屋企特別靚，乾淨企理，早餐好豐富，有之前去cafe攞既牛角包、蛋糕，仲有coffee、蕉、芒果、龍眼，好味，在農村望住稻田食早餐，感覺好似去田園野餐，好有趣，食物都好好味!
之後，導遊帶我哋周圍行，去跟當地人學整用宗樹的葉織玩具，好難學。
跟住，再去用木柱將穀舂碎，再放在鑊上爆炒，就成卜卜脆的爆米小食，好簡單，但好味。
行行吓，又去到另一村民屋企，食了一個木瓜，好甜，新鮮好味。
再返到村長屋企，飲個椰青，就返酒店，抖一陣，2:00又約好David出發去崩密列Beng Mealea，去崩密列，車程要1個鐘，三天門票亦唔包，要另買門票，US$5。崩密列是一座未經修茸過的寺院，賣點就是夠欄，夠殘。在入口處影影吓相，有個當地人聊我哋跟佢行，我哋都有諗跟佢好定行大路好。最後選擇跟佢行，個當地人帶我哋由一個窗口入去，在亂石中攀爬，好有探險感覺，仲要係裡面風境超靚，唔跟佢行，就唔會見到咁靚既地方，出返嚟，比咗幾蚊美金佢，原來佢有一隻腳比嗰度地雷炸斷咗，其實嗰度地雷仲在清除中，如果要到崩密列，不要自己周圍走會安全啲。
夜晚，又去Pub Street，食Cambodian BBQ，所謂Cambodian BBQ，即燒烤加打邊爐混合體，中央放一大塊肥膏，用豬油燒熟啲肉，2人餐US$16飯麫菜任添食，好好味!
返到酒店，最後一晚，當然要做返個spa，做完spa仲有時間去飲杯cocktail，間酒店太舒服，真係有啲唔捨得呀。
沒有留言:
發佈留言